आजच्या कॉम्प्युटर युगातसुद्धा गुदगत या आजाराविषयी फार समज-गैरसमज आहेत. जोपर्यंत शौचाच्या जागी काहीतरी त्रास उदा. आग होणे, रक्त पडणे, बेंड येणे, पू येणे, हाताला मांसल भाग लागणे इ. पैकी काही वाटत नाही, तोपर्यंत आपल्याला शौचाची जागा आहे, आपण तिचा जन्मापासून वापर करतोय याचे कधीच गांभीर्य नसते आणि मग वरीलपैकी त्रास झाल्यावर आपण जागे होतो आणि सुरु होतो एक न संपणारा प्रवास. कारण बोटाला थोडेसे कापले, तर आपण पटकन शेजारच्या डॉक्टरकडे जातो. मुलाला दुखायला लागले, तर आपण बालरोगतज्ज्ञाकडे जातो; परंतु शौचाच्या जागी काही त्रास झाला की मित्र, शेजारी, ओळखीचा, अक्षरश: बसमध्ये शेजारी बसलेला माणूस इ. व्यक्तींचे सल्ले घेतो. त्यापैकी कोणीही मूळव्याधतज्ज्ञ नाही, कोणालाही त्या आजाराच्या बोलीभाषेतील नावाशिवाय काहीही माहिती नाही. ती व्यक्ती रुग्णाला वेगवेगळे प्रयोग करण्यास सांगते व हेसुद्धा १००% ऐकतात का? हे कोडे मला कळालेलच नाही.

प्रत्येक जण त्याच्या आसपासच्या लोकांचे वेगवेगळे किस्से, प्रयोग इ. सांगून रुग्णाला आणखीच गोंधळात टाकतो व चालू राहतो हा न संपणारा प्रवास. मूळव्याध या आजारावर उपचार करणारे भोंदू, स्वयंघोषित वैद्य, कोणतीही वैद्यकीय पदवी नसणारे यांच्याकडे रुग्ण जातो व तीन दाहक, अॅसिड, नवसागर,चुना किंवा धागेदोरे बांधणे इ. गोष्टींचा प्रयोग होत राहतो. माझे सांगणे एवढेच आहे की, आपल्या ५०हजारांच्या गाडीचे पंक्चरसुद्धा आपण थोड्या ओळखीचा व्यक्ती पाहतो, तज्ज्ञ पाहतो, मग आपले लाखमोलाचे शरीर का कोणाच्या ताब्यात द्यायचे! आपण कोणाचेही ऐकतो. कारण ती जागा आपल्याला दिसत नाही. त्यासाठी प्रत्येक जण वेगळ्याच उपचार पद्धती सांगतो. लोकानुभव वेगळेच असतात. अशा प्रकारे मूळव्याध म्हणजे गोंधळच-गोंधळ.गोंधळून टाकणारा आजार. एक वेळेस हार्ट अटॅक माणसाला समजेल; परंतु मूळव्याध नाही. यासाठी मग कायकरावे, तर आपल्या जवळील मूळव्याध व भगंदरतज्ज्ञ डॉक्टरकडे जाये. आपली सर्व लक्षणे सांगावीत, आजाराचा काळ, सोबत इतर आजारांचे वर्णन सांगावे.

आयुर्वेदामध्ये लवकर गुण येत नाही, असा समाजामध्ये पसरलेला गैरसमज आहे; परंतु आज क्षारकर्म, क्षारसूत्र, अग्निकर्म, क्षारलेपन इ. उपचार पद्धतीमध्ये वेगवेगळे संशोधन करून रुग्णांवर यशस्वीरीत्या उपचार करून ही पद्धती तयार केली आहे. याचा फायदा म्हणजे मूळव्याध व इतर आजारांवर कोणतेही ऑपरेशन न करता, कोणताही अवयव, स्नायू न कापता कायमस्वरुपी उपचार शक्य आहे. म्हणून सामान्य जनता व इतरांनी अशी लक्षणे दिसल्यास लवकरात लवकर तज्ज्ञ डॉक्टरांकडून तपासून घ्यावे व आजारामधून मुक्त व्हावे.